පසුගිය සති අන්තයේ මියුනිච් ආරක්ෂක සමුළුවේදී, එක්සත් ජනපද රාජ්‍ය ලේකම් ඇන්තනි බ්ලින්කන් රාජ්‍ය තාන්ත්‍රික ප්‍රොටෝකෝල පසෙකින් තබා චීනයේ ඉහළම විදේශ ප්‍රතිපත්ති නිලධාරි වැන්ග් යී සමඟ කළ සාකච්ඡා ගැන වාර්තා කළේය.
"යුක්රේනයට එරෙහි ආක්‍රමණයේදී රුසියාවට මාරාන්තික ආයුධ සැපයීමට චීනය සලකා බැලීම ගැන අපි ඉතා කනස්සල්ලට පත්ව සිටිමු. රුසියාවට එවැනි ආයුධ ලබා දීමෙන් අපගේ සබඳතාවටද බරපතල ප්‍රතිවිපාක ඇති වන බව අපි චීනයට පැහැදිලි කළෙමු"
ප්‍රතිචාරයක් ලෙස, චීන විදේශ අමාත්‍යාංශයේ ප්‍රකාශක බ්ලින්කන් වැරදි තොරතුරු පතුරුවන බවට චෝදනා කළේය.
නමුත් ජර්මනියේ DER SPIEGEL ප්‍රවෘත්ති සේවය විසින් ලබාගත් තොරතුරුවලින් පෙනී යන්නේ බීජිං සහ මොස්කව් අතර සැලසුම් සහගත සහයෝගීතාවය Blinken සඳහන් කල කරුණුවලටත් වඩා දුරදිග යන බවයි.
එම තොරතුරු වලට අනුව, රුසියාව සඳහා කමිකාසේ මරාගෙන මැරෙන ඩ්‍රෝන විශාල වශයෙන් නිෂ්පාදනය කිරීම සම්බන්ධයෙන් රුසියානු හමුදාව චීන ඩ්‍රෝන් නිෂ්පාදකයෙකු වන Xi'an Bingo Intelligent Aviation Technology සමඟ සාකච්ඡා පවත්වයි. මෙම හෙළිදරව් කිරීම් රුසියාවට ලබා දිය හැකි චීන හමුදා සහාය පිළිබඳ විවාදයේ නව හදිසිතාවයක් ඇති කරයි
2023 අප්‍රේල් මාසය වන විට රුසියානු ආරක්ෂක අමාත්‍යාංශයට ZT-180 මූලාකෘති (prototype) ඩ්‍රෝන යානා 100ක් නිෂ්පාදනය කර ලබා දීමට බිංගෝ සමාගම එකඟ වී ඇති බව වාර්තා වේ.
මිලිටරි විශේෂඥයින් විශ්වාස කරන්නේ ZT-180 ඩ්‍රෝන යානයට කිලෝග්‍රෑම් 35 සිට 50 දක්වා පුපුරණ ද්‍රව්‍ය රැගෙන යා හැකි බවයි.
ZT-180 ඩ්‍රෝන යානයේ සැලසුම ඉරානයේ Shaheed 136 kamikaze ඩ්‍රෝන යානයට සමාන විය හැකි බව ආරංචි මාර්ග විශ්වාස කරයි. රුසියානු හමුදාව යුක්රේනයට එල්ල කරන ප්‍රහාරවලදී ඉරාන ඩ්‍රෝන සිය ගණනක් යොදවා ඇති අතර එහිදී ඔවුන් ඉරාන ඩ්‍රෝන යානා නේවාසික ගොඩනැගිලි, බලාගාර සහ දිස්ත්‍රික් තාපන පහසුකම් ඉලක්ක කිරීමට භාවිතා කළ අතර බොහෝ විට සිවිල් වැසියන්ට හානි සිදු විය.
රුසියාවට මසකට ඩ්‍රෝන යානා 100ක් පමණ නිෂ්පාදනය කළ හැකි වන පරිදි ඩ්‍රෝන් කොටස් සහ තාක්ෂණය රුසියාවට ලබාදීමට Bingo සමාගම සැලසුම් කර ඇති බව වාර්තා වේ.
රුසියානු හමුදාවට කලින් දැන සිටි ප්‍රමාණයට වඩා සැලකිය යුතු සහයෝගයක් ලබාදීමට චීනය පසුගිය වසරේ සැලසුම් කර තිබූ බව පෙනේ. DER SPIEGEL විසින් ලබාගත් තොරතුරු අනුව, චීනයේ හමුදාවේ පාලනය යටතේ ඇති සමාගම් රුසියාවේ SU-27 ප්‍රහාරක ජෙට් යානා සහ අනෙකුත් මාදිලි සඳහා අමතර කොටස් ලබා දීමට සැලසුම් කර තිබුණි.
DER SPIEGEL සිය විමර්ශනයේදී දැනගෙන ඇත්තේ මිලිටරි ගුවන් යානාවල කොටස් සිවිල් ගුවන් සේවා සඳහා අමතර කොටස් ලෙස පෙනෙන පරිදි නැව්ගත කිරීමේ ලියකියවිලි ව්‍යාජ ලෙස සකස් කිරීමට දැනටමත් සැලසුම් කර ඇති බවයි.
ජනවාරි මාසයේදී නෙදර්ලන්ත රජයේ ප්‍රවෘත්ති ඒජන්සිය NOS වාර්තා කළේ නෙදර්ලන්ත මයික්‍රොචිප් චීන සමාගම් හරහා රුසියානු ආරක්ෂක සමාගම් වෙත ලබා දී ඇති බවයි. වාර්තාවට අනුව, යුක්රේන හමුදා විසින් අල්ලා ගන්නා ලද රොකට්, හෙලිකොප්ටර් සහ ඩ්‍රෝන වැනි රුසියානු ප්‍රහාරක ආයුධ පිළිබඳ විශ්ලේෂණයකින් පෙන්නුම් කළේ පරීක්ෂා කරන ලද රුසියානු ආයුධ 27 න් 10 කම නෙදර්ලන්තයේ මයික්‍රොචිප් සවි කර ඇති බවයි.
මාස ගනනාවක් තිස්සේ යුක්රේනයේ සටන් කලාපවල චන්ද්‍රිකා ඡායාරූප චීන සමාගම් රුසියානු පාර්ශවයට ලබා දෙන බවට යුරෝපීය සංගමයේ රටවල ආරක්ෂක නිලධාරීන් අතර වාර්තා පැතිරෙමින් තිබේ. ඊට ප්‍රතිචාර වශයෙන්, එක්සත් ජනපද ආන්ඩුව මෑතකදී චීන චන්ද්‍රිකා සමාගමක් වන Changsha Tianyi අභ්‍යවකාශ විද්‍යා හා තාක්ෂණ ආයතනය එහි සම්බාධක ලැයිස්තුවට ඇතුළත් කළේය.
යුක්රේනයේ යුද්ධය සඳහා ඔත්තු බැලීම සඳහා භාවිතා කළ හැකි රුසියානු පාරිභෝගිකයින්ට චීනය වාණිජමය වශයෙන් ලබා ගත හැකි ඩ්‍රෝන යානා ද ලබා දෙන බවට ජර්මානු රජයට තොරතුරු තිබේ. හමුදා නිලධාරීන් මෙම උපකරණ ද්විත්ව භාවිතය ලෙස හඳුන්වන්නේ ඒවා සිවිල් සහ හමුදා යෙදුම් සඳහා භාවිතා කරන බැවිනි.
DER SPIEGEL විසින් ලබා ගත් තොරතුරු වලට අනුව, එක්සත් අරාබි එමීර් රාජ්‍යය හරහා චීනය පාලනය කරන ආනයන අපනයන සමාගම් විසින් ඩ්‍රෝන යානා රුසියානු හමුදා වෙත ලබා දෙනු ලැබේ. මෙම ගනුදෙනු පිළිබඳ තොරතුරු දන්නා බුද්ධි අංශ නිලධාරීන් පවසන්නේ යුක්රේනයේ පෙරමුණේ ඔත්තු බැලීම සඳහා රුසියානු හමුදා එවැනි ඩ්‍රෝන යානා යොදවා ඇති බවට සාක්ෂි පවතින බවයි.