ෆේස්බුකියෙන් උපුටාගත් මේ පෝස්ටුවට අනුව, නිව්ටන්ගේ හිසට ඇපල් ගෙඩියක් එවූ ගස තවමත් ජීවමානය. එහෙත් බුකියේ යන බොහෝ තොරතුරු මෙන්ම මෙයද සාවද්‍ය කරුණු මත පදනම් කරගත්, හුදෙක් ලයික් ගැනීම සඳහා නිර්මාණය කල පෝස්ටුවකි.
මෙවැනි පෝස්ටුවලින් ඉගෙන ගන්නා දරුවන් බොහෝ වැරදේ ඉගෙන ගන්නා අතර, එය විශාල ගැටලුවකි.
ඒවගේම බොරු ෆේස්බුක් පෝස්ටු නිසා සමාජය තුල විවිධ කැළඹීම් හටගත් වාරද අනන්තය.
මේ පිලිබඳව කරුණු ගවේෂණය කල අපට සොයාගත හැකි වුනේ මෙය නිව්ටන් ජීවමාන කාලයේ ඔහුගේ හිසමතට වැටුනු ඇපල් ගෙඩිය හටගත් ගස නොවේ. එම ගසේ ඇටවලින් පැලවුන, එම ස්ථානයේම පැලවී තිබෙන, එම ගසෙන් පැවත එන වෙනත් ගසක් බවයි.
සාමාන්‍යයෙන් ඇපල් ගසක් අවුරුදු 30-50ත් අතර කාලයක් ජීවත් වන බව ඇපල් ගස්වල පැවැත්ව්ම සිදුකල ගවේෂණ වලින් හෙලිවී තිබෙනවා.
ඒවගේම ඇත්තටම නිව්ටන්ගේ හිසට ඇපල් ගෙඩියක් වැටුනාද යන්න පිලිබඳවත් නිශ්චිත තොරතුරක් නෑ. නිව්ටන්ගේ පොත්පත්, ලියුම් හා පර්යේෂණ පත්‍රිකාවලද, ඔහුට ගුරුත්වාකර්ෂණය පිලිබඳව අදහස මතුවූ දිනය පිලිබඳව හෝ ඇපල් ගෙඩියේ වැටීම පිලිබඳව සටහනක් නෑ.
කෙසේ වෙතත්, මූලාශ්‍ර අනුව එම සිදුවීම (එසේ සැබවින්ම වුනානම් ) නිව්ටන් වුල්ෆ්ත්‍රෝප් මැනර් මන්දිරයේ පර්යේෂණ කටයුතුවල නිරතවුනු 1665-1666 වසරවල සිදුවිය යුතුයි.
කෙසේ වෙතත්, එලෙස ඇපල් ගෙඩියක් නිවුටන්ගේ හිස මතට වැටුනානම්, එම ඇපල් ගෙඩිය හටගත් ගස 1666දී ජීවමානව තිබිය යුතු අතර අදවනවිට එම ගසට වයස අවුරුදු 358 පමණ විය යුතුයි. එහෙත් ඇපල් ගසක් එතරම් කල් ජීවත් වන බවට කිසිම විද්‍යාත්මක සාක්ෂියක් නෑ.