අමෙරිකානු හා දකුණු කොරියානු බළධාරීන්ට අනුව, උතුරු කොරියාව අද තවත් මිසයිල අත්හදා බැලීමක් සිදුකලා. මධ්‍යම දුර මිසයිලයක් ලෙස සැළකෙන මෙය කිලෝමීටර් 560ක් ඉහලට ගමන් කොට නැවත මුහුදට ඇදවැටී තිබෙනවා.
අමෙරිකානු පැසිෆික් අණදෙන මූලස්ථානය සිය රේඩාර් හා නිරීක්ෂණ යානා මගින් මෙම මිසයිල අත්හදා බැලීම තියුණු අධ්‍යයනයකට ලක් කොට තිබෙනවා.
උතුරු කොරියාව මීට සමාන මිසයිලයක් පෙබරවාරියේ අත්හදා බලා තිබෙනවා. පෙබරවාරියේදී ජංගම විදිනයක් මගින් දියත්කල Pukguksong-2 වර්ගයේ මිසයිලය ඝණ ඉන්ධන මිසයිලයක් ලෙසයි සැළකෙන්නේ.
උතුරු කොරියාව ඝණ ඉන්ධන රොකට් තාක්ෂණය දියුණු කරගැනීම කලාපයට බලවත් තර්ජනයක් බව දකුණු කොරියාව පවසනවා. ඝණ ඉන්ධන රොකට්ටු ඉතා ඉක්මණින් දියත්කල හැකි අතර, පහසුවෙන් ප්‍රවාහණය කල හැකියි. ද්‍රව ඉන්ධන මිසයිල දියත්කිරීමට පෙර ඉන්ධන පිරවිය යුතු අතර ඒ සඳහා ඉන්ධන ටැංකි සහිත පරිවාර රථ ගණනාවක් අවශ්‍ය නිසා චන්ද්‍රිකා මගින් එවැනි දියත්කිරීම කල්තබා හඳුනාගත හැකියි.
උතුරු කොරියාවේ අරමුණ ඉතා ඉක්මණින් ඇමරිකා එක්සත් ජනපදයට පහර දිය හැකි අන්තර්-මහද්වීපික බැලිස්ටික් මිසයිලයක් (ICBM) නිපදවා ගැනීමයි. මේ සඳහා පහසුම මාර්ගය ඝණ ඉන්ධන රොකට් තාක්ෂණය දියුණු කරගැනීම බව පවසන ආරක්ෂක විශේෂඥයි, උතුරු කොරියාවට ICBM මිසයිලයක් නිපදවාගැනීමේ කෙටිම මාර්ගය Pukguksong-2 මිසයිල එන්ජින් කිහිපයක් බූස්ටර් රොකට්ටු ලෙස යොදාගන්නා විශාල රොකට්ටුවක් නිපදවීමයි.
__________________________________________________________________________
VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. .POSTED BY : Terence Kahapola Arachchi .AUTHOR/OWNER/ADMINISTRATOR . CONTACT : terence.arachchi@gmail.com.GOOGLE + : About Me .FACEBOOK : www.facebook.com/terence.arachchi . __________________________________________________________________________